2006/01/29

> Berria: Familia > BIDE MALDATSUA: FAMILIA BERRIEN ESPERIENTZIAK

  • Bide maldatsua: familia berrien esperientziak
  • Adoptatzeko eskubidea onartu zaien arren, sendia osatzeko bide korapilatsua daukate oraindik bikote homosexualek
  • Berria, 2006-01-29 # Iñigo Bilbao, Bilbo
Bere homosexualitatea ukatzera derrigortuta egon da gizon asko umea adoptatu ahal izateko. Txinan, esate baterako, eta han jaioak dira adoptatutako ume dezente haurra hartzen duten gizon ezkongabeek agiria sinatu behar izaten dute homosexualak ez direla zin eginez. Arazoa, gainera, ez da haurra etxean dutenean amaitzen, umearen sorterriko agintariek hainbat urtez jarraipena egiten baitiote prozesuari.

Ekialdeko beste herrialde batzuetan ez da halako agiririk sinatu behar izaten, baina umeak 18 urte bete artean, urtero eskolaren eta medikuaren agiria eta umearen argazkia bidali behar dute herrialdeak Madrilen daukan enbaxadara.Horrek guztiak beldur handia eragiten die familia osatzeko nazioarteko adopzioa baliatu duten gizonei; ikusezin bihurtzen ditu. Bikote bakarra sartu da Magala elkarte berrian. Beste batzuk ausartu ere ez dira egiten oraingoz, umea kenduko dieten beldur direlako.Gezurra esan zuten, beste aukerarik izan ez zutelako. Hego Euskal Herrian eta Espainiako araudien eraginaren pean diren gainerako herrialdeetan baino ezin dute legez adoptatu, eta hor ez dago umerik.Hainbat lekutan bada amak alokatzeko modua, edo mutil bikote bat neska bikote batekin adostu eta ernalketa baliatzeko aukera. Euskal Herrian, baina, galarazita daude halako bideak.
  • Salbuespenezko familiak
Salbuespen bezala hartu badaitezke ere, badira lehenago emakume batekin egindako familia gero gizon batekin osatutako familiara eraman duten gutxi batzuk. Bilbon, adibidez, Iñakik eta Albertok, eta lehenengoaren alaba biek osatzen dute sendi homoparental horietako bat. Familiari Albertoren semea gehitzen zaio, gainera, mutikoari aitarekin egotea egokitzen zaion asteburuetan.

«Geuk, emakumeok, gizonezkoek baino errazago daukagu familia egitea, ez bakarrik biologikoki zailtasunik ez daukagulako, baita adoptatzeko edo etxean daukagun errealitatea araupetzeko traba gutxiago jartzen dizkigutelako ere». Marijo Mendietak ondo daki hori. Horrek ez du esan nahi, baina, bide erraza izan dutenik berak eta Rosa neska-lagunak. «Umea jaio eta izena ematera Erregistro Zibilera joan ginenean, nahitaez aitaren izena jartzeko eskatzen ziguten. Ondo zekiten, legez, intseminazio artifiziala egiten denean debekatuta dagoela hazi-emailea nor izan den ezagutaraztea; lesbianak ginela eta Izatezko Bikoteen Erroldan geundela bazekiten eta, hala ere, aitaren izena eskatzen ziguten. Ez sinestekoa izan zen han gertatu zena».Baina ez ziren hor bukatu Marijo eta Rosaren buruhausteak. Urte eta erdi geroago, epaileak bien amatasuna aitortu zienean, Familia Liburuaren bila joan zirenean, trabak besterik ez zizkieten ipini. «Bi egun eduki gintuzten Familia Liburuaren zain, nahiz eta epaitegiko ebazpenarekin joan eta epaileak agirian argi eta garbi esan biok ginela umearen amak eta bion abizenak hartu behar zituela mutikoak».Bizkaian, Nereak eta Kristinak ere ezagutarazi dute Kristina alabatxoak beren bizitzan zer eragin izan duen: «Gure kasuan, administrazio tramite askotan lehenak izatea izan dugu berritasunik handiena: ezkondu, adoptatu, Familia Liburua aldatu eta, zenbaitzuetan, inprimaki zaharkituak nola bete ez dakien funtzionarioarekin topo egitea».

Bikote homosexualen aitatasun edo amatasun gaitasuna ukatzen dutenek umeak jarri ohi dituzte aitzakia bezala euren arrazoiak nabarmentzeko. Iratik 29 urte ditu, eta ume txikia zela gurasoak banatu zirenetik, aitaren eta amaren etxeetan bizitzea egokitu zitzaion; bietan, biekin eta biek hartutako bikotekide berriekin. Emakumezkoak biak. «Etxe bietan maitasuna izan zen lehentasuna eta, beraz, guraso genituenen generoari ez, pertsonari eman diogu beti garrantzia. Bai aitarekin, bai amarekin, eta beren neska-lagunekin oso harreman ona, orekatua eta komunikazio handikoa izan dugu beti».

Irakasle dabil egun eskola batean. «Izugarria da, ikasgelan eredu oso desberdinetako familietako umeak ditugun arren, liburuetan eta ikasgaietan oraindik betiko eredu zaharkitua agertzen da, bakarra balitz bezala».

> Berria: Elkarteak > SEXU BEREKO GURASOEN HAURRAK BABESTEKO, MAGALA SORTU DUTE

  • Sexu bereko gurasoen haurrak babesteko, Magala sortu dute
  • Bikote homosexualen arteko familiek sortu dute elkartea, gizarteari aurreiritziak gainditzen laguntzeko
  • Berria, 2006-01-29 # Iñigo Bilbao, Bilbo
Familia zer den, eta zer ez, hizpide izan da azken hilabeteotan, bikote homosexualei ezkondu eta umeak adoptatzeko aukera aitortuko zietela jakinarazi zenetik. Auziak ika-mika handiak eragin ditu, mikatzegiak askotan. Askori ez zaio buruan sartzen sexu bereko gurasoak izan daitezkeenik. Ez dira ohartu, ezagutu ez badituzte ere, halako sendiak aspaldi dituztela inguruan. Ez dakite legea egin zitekeela pentsatu baino lehenagokoak direla sendi horiek.

Izena hartu dute orain. Familia homoparentalak dira, ezaugarri bereziak ez ezik, berariazko arazoak eta premiak dituztenak. Horiek guztiak asetzeko elkartea sortu dute orain. Magala du izena, Gipuzkoan sortu dute, eta bere baitan ia hogei familia batu dira dagoeneko.Sexu bereko gurasoak dituzten umeei topagune bat eskaini nahi die elkarteak, etxean dutena beste nonbaiten ikus dezaten. Marijo Mendieta buru-belarri sartuta egon da elkartearen sorreran. Haren izena ezaguna egin zen Aitorrek bi ama ditu ipuin liburua kaleratu zuenean. «Psikologoek argi esan digute gure seme-alabek euren egoera berean bizi diren umeak ezagutu behar dituztela, desberdinak edo bitxiak ez direla jabetu daitezen. Ondo dakigu desberdina dena, ezagutzen ez dena ez dela hain erraz aintzat hartzen».Mendietak eta haren neska-lagunak bezala umeak dituzten bikote homosexualek bizi izan duten esperientzia eskaini nahi diete bide beretik abiatu nahi duten bikoteei. Hori da, umeei eredua ezagutaraztez gain, elkartearen helburua: haurra izan nahi duten bikote homosexualei informazioa ematea, eta zein aukera dituzten jakinaraztea; esperientzien trukea egiteko topaketak, tailerrak, berbaldiak eta gisakoak egitea; eta gizartearen baitan kontzientziazio lana egitea, dauden aurreiritziak gainditzeko.
  • Betikoak, gutxienak gaur

«Jendeak ezkonduta dauden aita-amek eta haien seme-alabek osatutako familiak dauzka buruan, eta ez dira ohartzen gurean, Euskal Herrian, horiek gutxienak direla gaur egun». Hori esaterakoan banatutako gurasoak, ama ezkongabeak, adopzioaren bidez osatutako familiak edo sexu bereko gurasoen familiak ditu buruan. Eta horiek Euskal Herrian familien %52 dira gaur egun.

Magala oraintsu legeztatu badute ere, aspaldi hasi ziren elkartzen, Gasteizko Legebiltzarrak Izatezko Bikoteen Legea onartu eta adopzio eskubidea aitortu zienean, hain justu. Umea bikotearen barruan, intseminazio artifizialaren bidez egin arren, legeak ama biologikoa baino ez zuen aintzat hartzen: «Beste kideak legez kanpokoak ginen, inolako eskubiderik gabekoak». Prozedurarekin hasi zirenean, baina, Alderdi Popularrak errekurtsoa ipini zion legeari, eta bertan behera geratu ziren adopzio eskaera guztiak. Latzak izan ziren hilabete horiek bikote askorentzat. Espainian gobernu aldaketa izan eta agintari berriek Kode Zibila aldatuko zuen legea iragartzearekin batera helegitea atzera bota zutenean, amaitu ziren askoren estualdiak. «Jendeak uste du lege berriarekin dena konpondu dela, eta ez da hala, beldur handia dago oraindik, gizarteak besterik adierazi arren, ez duelako aintzat hartzen oraindik homosexualitatea».

Eskolan hutsune nabarmena sumatu dute, ikasleei gutxiena den eredua berezkoa, ohikoa eta nagusi balitz bezala erakusten dietelako oraindik. «Indarrak batu nahi ditugu Hezkuntza Sailaren aurrean presioa egiteko».Hori izango da elkartearen xedeetako bat, laster. Orain egoitza lortu nahian dabiltza. Zarauzko Udalari txoko bat uzteko eskatu diote, baina erantzunaren zain daude oraindik. Elkartea Gipuzkoan sortu badute ere, sexu bereko gurasoen familiak nonahi aurki daitezke. Horietako gehienak emakume bikoteak dira.

  • Bestelako esperientziak

Bizkaian, Aldarte izeneko arreta zerbitzuan, aspaldi sortu zuten Ama lesbianak izeneko gogoeta taldea. Magala barruan garatu nahi dituzten ekimenak egiten dituzte bertan, eta Familia ereduak eta gizarte aldaketak: Homosexualen gurasotasuna eztabaidagai izeneko liburuxka kaleratu dute berriki gaiaren inguruko gogoeta sustatzeko.

Amparo Villar ari da Aldarte barruan taldea koordinatzen. «Gehienak intseminazio artifizialaren bidez sortutako umeak dira eta, beraz, oraingoz taldea, batez ere, amei eta haiek bezala ama izan nahi duten emakumeei dago zuzenduta».

Hilean behin elkartzen dira elkartearen egoitzan. «Amatasuna zelan bizi izan duten azaltzen diote elkarri, eta bide beretik joan nahi dutenei aukerak zeintzuk diren ere bai. Zailtasunak ahaztu barik, noski: intseminazio artifiziala zelakoa den, non eta zelan egiten den, zenbat balio duen, gorputzean zelako eragina duen, hori guztia etxekoei azaltzeko zein arazo izan dituzten...».

Aztergai ere bihurtu dira taldeko ama horiek, unibertsitateetan gaiari buruzko ikerketak egin nahi izan dituztenean, haiei egokitu baitzaie aurpegia ematea.Halako familiak Araban eta Nafarroan badira. Baina Gasteizko Enfasis zerbitzuan eta Iruñeko Kattalingorri elkartean batzen hasi direnik ez dakite, oraindik ez dute horren berri izan.