> Berria: Eliza > FAMILIA ANIZTASUNA ONARTZEKO ESKATU DIOTE ELIZARI TALDE KATOLIKOEK

• Familia aniztasuna onartzeko eskatu diote Elizari talde katolikoek
• Berria, 2006-07-05 # Erredakzioa, Bilbo

Euskal Herriko hainbat talde katolikok elkarretaratze isila egingo dute bihar Bilbon, Elizak familiaren inguruan duen iritzi eta ikuspegiarekin ados ez daudela adierazteko. Familia aniztasuna onartzen dugu da Kristau Sarea Foroak, Fedea eta Justizia taldeak, Eliza Gara eta Arnasatu emakume kristauen taldeak deitutako elkarretaratzerako aukeratutako leloa. Taldeok adierazi dutenez, euren elkarteetan 200dik gora apaiz, erlijioso eta laiko biltzen dira, eta herritarrei elkarretaratzean parte hartzeko deia egin diete. Protesta Bilboko Katedralaren aurrean izango da, 19:30etik aurrera.

• Aniztasuna, aberastasuna

Talde katoliko horien iritziz, familia aniztasuna «zaindu eta garatu beharreko aberastasuna» da. Euren iritziz, aberastasuna ez da mehatxua.

«Nazareteko Jesusen jarraitzaile gara, eta gure jardunaren zutabea ez da bazterketa. Guk sexu bereko bikoteak edota banatutako bikoteak onartzen, babesten eta laguntzen ditugu». Horregatik, talde katolikook Elizari familia aniztasuna errespetatzeko eta onartzeko eskatu diote, eta, era berean, «Benedikto XVI.a aita santuak defendatzen duen familia eredu bakarra» bazterrean uzteko. Hain zuzen, uztailaren 8 eta 9an Valentzian (Herrialde Katalanak) egingo den Familien Nazioarteko Topaketetan izango da Aita Santua. Han defendatuko duen ereduarekin ados ez daudela adierazteko antolatu dute biharko ekimena. «Gure ustez, elkarbizitzako modu ezberdinak ez dio familia ereduari mehatxu egiten. Txirotasunak, immigrazioak, langabeziak, etxebizitza eta lan duina ez izateak, prekarietateak, etxeko indarkeriak, kontsumismoaren eta indibidualismoaren ondorioek, edota maitasun faltak sortutako sufrimenduak egiten diote kalte familiari».