> Berria: Ekainak 28 > DONOSTIAKO MANIFESTAZIOAN TRANSEXUALEN ESKUBIDEAK ALDARRIKATU DITUZTE

• Manifestazioa » Gay eta Lesbianen Nazioarteko Eguna
• Transexualen eskubideak aldarrikatu dituzte
• Gay eta Lesbianen Nazioarteko Egunaren harira, gay, lesbiana eta transexualen aurkako erasoak salatu dituzte festa giroan eginiko manifestazioan
• Irutxuloko HITZA, 2006-06-29 # Erredakzioa

Bulebarretik abiatutako manifestazioa izan zen Euskal Herriko Gay eta Lesbianen Nazioarteko Egunaren harira, egindako ekitaldi nagusia. Ohi bezala, festak eta aldarrikapenak bat egin zuten Erdialdeko kaleetan Transexualak aurrera lelopean eginiko manifestazioan. Manifestazioa oso koloretsua eta jendetsua izan zen urtero bezala. Aurten, batukada batek jarri zuen erritmoa. Ibilbidea irekitzen ortzadarraren koloretako bandera bat eraman zuten hainbat lagunek eta Transexualak aurrera! lelopeko pankartaren atzean ehunka lagun bildu zen.

Bukaeran, agiri bat irakurri zuten. Transexualen eskubideak izan ziren aurtengo Gay eta Lesbianen Nazioarteko Egunaren ardatza. «Legeak aurrera doaz, baina oraindik asko dago egiteko. Gizon eta emakume transexualoi dagozkigun eskubideak ukatzen dizkigute. Lehenbailehen onartu behar da genero identitateari buruzko legea eta Osasun Publikoak sexua aldatzeko ebakuntza bere gain hartu behar du, doan izan behar du», aldarrikatu zuten.

• Homofobia salatuz

Bestalde, hainbat gayk, lesbianek eta transexualek jasandako jipoiak eta irainak izan zituzten ahotan, eta haiek saihesteko bideak zerrendatu zituzten. «Diskriminazioaren aurrean, berdintasuna aldarrikatzen dugu; tolerantzia ezari eta gorrotoari aurre egiteko, errespetuaren alde dihardugu; bortizkeria eta sexu erasoak desagertarazteko, balio progresistetan oinarritutako heziketa nahi dugu eta Hiesa eta antzeko gaixotasunei aurre egiteko, prebentzioa eskatzen dugueta baita baliabide gehiago erakundeen ikerketarako eta konpromisoa gaixoekiko. Eskubideak eta askatasuna aldarrikatuz homofobia eta trans- fobiarekin bukatuko dugu», adierazi zuen hizlariak.

Aita Santuaren zuzendaritzapean, Valentzian egingo duten Munduko Familia Topaketaren kontra ere gogor egin zuten. «Errespetuari, elkarrizketari eta gizartearen errealitateari irain egiten diote, eta heterosexismoa, matxismoa, lesbofobia eta transfobia inposatzen jarraitu nahi dute», adierazi zuten.

Duela gutxi hildako Santi Altxu Madelon ere gogoan izan zuten eta manifestazioa hasi aurretik minutu bateko isilunea egin zuten. Euskal Herriko gay eta lesbianen alde hasieratik lan handia egin zuela eta hari egin diezaioketen omenaldirik onena lanean tinko jarraitzea dela azpimarratu zuten.